Det finst ingen lovfesta rettar når det gjeld gåvekort og byte av varer. Her er nokre tips for å unngå krangling i butikkane etter jul.

Gåvekort
Det er mange grunnar til å gje gåvekort til jul, mellom anna at mottakaren får bestemme sjølv kva han vil ha, og at man kan få meir for pengane i romjulssalet. Kan butikken bestemme at gåvekort ikkje gjeld på salsvarer?

• Vi har ingen lovreglar om gåvekort.
• Sjå alltid etter om gåvekortet har nokre avgrensingar. Til dømes er det berre gyldig i ein kort periode eller gjeld ikkje for alle varer i butikken.
• Spør seljaren om gåvekortet kan nyttast på salsvarer eller ikkje.
• Gåvekorta er gyldige i 3 år om ikkje anna er sagt.
• Om ein ikkje handlar for heile summen på kortet kan ein vanlegvis ikkje få kontantar tilbake, men ein tilgodelapp.
• Les alt med lita skrift på gåvekortet!

Å byte varer
Ein treffer ikkje alltid like godt med gåvene. Nokre gonger er buksa for stor eller genseren har feil farge. Kva rettar har ein eigentleg til å byte julegåver? Vi har ingen lovbestemt byterett, men mange forretningar tilbyr ei byteordning. Dei kan bestemme vilkåra for byteretten sjølv. 

• Det er alltid lurt å be om bytekort, passe på kvitteringa og kontakte butikken så snart som mogeleg.
• Vara må vere ubrukt og utan skadar - i  nokre tilfelle får du ikkje byte vara dersom du har brote emballasjen.
• Hygieniske artiklar, kroppsnære klede, særleg ømfintlege varer eller varer som tapar seg raskt i verdi får ein ofte ikkje byte. Avtal difor særskilt med seljaren når du kjøper slike gåver.
• Dersom det er noko i vegen med vara kan du krevje ny vare eller reparasjon. I nokre tilfelle kan du ha krav på avslag i prisen, heving av kjøpet eller skadebot.
• I hovudsak kan ein berre krevje å få byte i same butikk eller kjede og til ein anna vare.
• Oftast må ein seljar godta at du byter til ein dyrare vare dersom du betaler mellomlegget.
• Du kan ikkje krevje å få pengar tilbake dersom vara du byter til er vesentleg billigare enn den du hadde - men du kan krevje ein tilgodelapp som er gyldig i tre år om ikkje anna er sagt.
• Kjøper du vara utafor fast utsalsstad (mellom anna dørsal, messe, postordre, Internett), gjeld angrerettlova. Du har da 14 dagar angrerett. Sjå våre tips for trygg julehandel på Internett.